Igat bikpela askim ibin kamap olsem ol sios long Pacific imas autim moa toktok long mekim Indonesia i kamap wantaim gutpela wei long lukautim West Papua pipol.

Ol lida blong ol sios long Pacific itok ol sios long rijon i imas mekim moa samting long toktok strong long ol toktok iwok long kamap olsem ol soldia blong Indonesia iwok long kamapim ol bagarap long Papua provins blong Indonesia.

Image: Polis blong Indonesia i lukluk long ol trabel long West Papua (Credit: AFP)

Catholic Bishop's Conference blong Papua New Guinea na Solomon Islands igat wankain tingting long dispela, we oli tok emi taim tu long ol lotu blong rejon imas kamap wantaim bung tingting blong dspela wari blong ol West Papua pipol

Father Victor Roach General Sekretari blong Catholic Bishop's Conference blong Papua New Guinea na Solomon Islands itok lotu Catholic blong PNG igat bikpela wari long dispela na ol bai mekim wanem samting oli ken long sapotim dispela tingting blong ol arapela lotu blong Pacific.

Emi tok nau lukm planti West Papua pipol long Papua New Guinea na oli askim strong ol pipol blong Papua New Guinea imas givim sampela kain halivim igo long wari blong ol. Father Roach itok long sait blong Catholic Bishops Conference oli gat wankain wari na bai oli mekim wanem samting oli ken long harim wari blong ol na givim wanem kain halivim oli ken.

Long wanpela bung ino long taim igo pinis long Port Moresby blong luksave long wok blong Gavana blong National Capital District Powes Parkop long sait blong Human Rights, Father Victor Roach itok planti mausman blong ol arapela sios tu ibin stap na oli sapotim tingting blong imas gat luksave long askim blong ol West Papua pipol.

Long sait blong Pacific ibin gat toktok tu ikam long General Sekretari blong ol Pacific Sios Reverend Francios Pihaatae we emi tok ol sios blong Pacific ibin pasim maus longpela taim tumas long dispela wari blong West Papua olsem na planti ol bagarap ol pipol long hap iwok long kisim.

Emi tok em ino wok blong ol sios long mekim West Papua i kisim independent ,tasol oli nap kamapim sampela senis sapos oli autim toktok blong ol long ol heve iwok long kamap long West Papua na hope bai mekim Indonesia i sensim pasin blong em.