Logging i bagarapim wara long Inaina Wildlife management Area long Kairiku Hiri District long CentralProvince (PWM Photo) 

Source: ABC Radio Australia - Caroline Tiriman

Gavana blong Oro Provins long Papua New Guinea itok taem i kamap pinis long ol papa graun imas sanap strong agensim ol foran kampani em oli wok long stilim graon aninit long despla Special Agrikalsa Bisnis Lisis oa SABL.

Gary Juffa i mekim despla toktok bihaen long Chief Secretary blong gavman, Sir Manasupe Zurenuoc itok bai gavman i karim aut ol toktok long ripot blong wanpla wok painimaut igo long SABL.

Despla wok painimaut em Commission of Inquiry igo long ol  SABL em oli bin statim long 2011  ibin tok olsem oli mas stopim planti long ol despla tok oraet ino bin bihaenim loa na ol kampani ibin mekim ol giaman pasin long kisim nating graon.

Tasol Gavana Juffa i tok ikam inap nau nogat wanpla gutpla stori i kamap iet long despla ripot em despla enkuairi ibin mekim.

Em i tok ol papa graun imas sanap strong long rausim ol displa SABL lease we em ol giaman samting blong stilim nating graun blong ol pipol blong Papua New Guinea.